Argi berria
Aldapan gora noa arratsaldez,
ikusten dudanari ezikusiarena egiten,
lan erraldoien bideragarritasun eza gogoan
jendeari erreparatu gabe begira,
ezinegona uxatuz arnasa sakon hartuta,
goian topatuko dudan horretan pentsatu gabe,
zenbaki bat buruan,
nagitasun batek alfertuta,
seinale gorriei jarraituz, gora,
ate zabal baten atzean
argi izpi bat topatu arte,
bitxia, txikia, sortu berria.
