Eskuak harrapatuta
Lehenik ezker eskua sartu nuen,
ondoren eskuina,
eraikinak behe aldean zuen arrakalan.
Barrukoa ukitu nahi nuen,
barruko hartu, erabili.
Eta horrela egin nuen:
behin bi eskuak sartuta nituela paretako pitzaduran
izara moduko zerbait heldu nuen
behatzen artean,
oihal luze eta zabal bat,
eta hura astintzeari ekin nion,
mahai-oihalari ogi apurrak kentzeko
egiten zaion moduan.
Zapiaren gaineko kondar guztiak
erori ziren lurrera
baina nire eskuak arrakalan harrapatuta
geratu ziren ustekabean
paretaren beste aldean.
