Sagastia bidean
Elkartzen gaituen bidearen erdian
sagastia,
gaurko egunez goibela.
Sagarrei lapurtutako zukuak
kupeletan itxaroten du udaberria.
Sagarrondoen adarrek
iluntzeko lainoetan erdi gordeta
ur tantak isurtzen dituzte
noizbait loratuko diren kimuetatik.
Txindurri eta momorroak
hotz larritik babestu
lur ilunaren azpian.
Urrutiko tximinia batetik
iristen den ke zuri finaren usaina,
egur errea eta jana.
Zu sagastiaren beste aldean
elkartzen gaituen bide erditik haratago
hainbestetan zapaldutako
tarteka asfaltoz tarteka buztinez,
harri txingorrez beteriko
kamino zaharra.
Elkartzen gaituen bide erdian
ez gara sekula egon,
automobileko leihotik begira
ikusi ditugu sagastiak,
buztinezko zidorrak
eta neguko lurrun hotzak.
